Ár uxans

Nú er ár uxans gengið í garð með tilheyrandi sprengingum sem náðu hámarki á miðnætti á sunnudagskvöld. Hugi segir að kínverska nýárið sé sitt uppáhalds frí, þá sé  hægt að sprengja. Við keyptum eitthvað smáræði og Mattias og Elin nágrannar okkur líka en krakkarnir í hverfinu eru búin að vera að sprengja í marga daga. Stirnir fékk einn kínverja í hettuna hjá sér sem sprakk þar og skildi eftir sig brunagat, bræðurnir og Boggi og Örn sem voru viðstaddir þegar þetta gerðist sóru af sér alla ábyrgð. Fyrir utan hliðið okkar er gamall sófi sem einhver setti þar út í síðustu viku og í sprengiæðinu sem rann á krakkana hoppuðu þau í honum og vildu brenna hann. Sófinn er þarna enn en pullurnar eru horfnar úr honum, kannski voru þær brenndar.

Janúar hefur annars verið rólegur, skólinn var bara í tvær vikur og svo var aftur komið frí. Í síðustu viku komst Stirnir í hóp verðlaunahafa í lestrarástundun og frú Wiser kennarinn hans hélt hádegispartí fyrir lestrarhestana. Ég og tyrknesk mamma sáum um veitingar og börnin borðuðu vel og skemmtu sér í leikjum. Kjartan fór svo í heimsókn í Stirnisbekk í vikunni og las fyrir börnin.

Bræðurnir byrjuðu aftur í kúngfú eftir langt hlé og fóru í prufutíma í jiujitsu.

Eyja æfir sig í að standa upp og ganga með. Hún er búin að læra að fara upp stigann og um helgina var hún sett í æfingabúðir heima hjá Láru þar sem Hugi og Boggi fylgdu henni upp á þriðju hæð. Þeir voru svo hrifnir af afrekinu hjá henni og vildu láta skrá það í heimsmetabókina.

Hér er sería þar sem Eyja gekk með stól þvert yfir stofuna:

Einn fíll lagði af stað í leiðangur...

Skemmtilegt að fá svona athygli

komin nokkuð langt, þarna stöðvaðist stóllinn á mottunni

skiptir yfir á næsta stól

og fer ofurvarlega niður á gólf

Þá tekur skriðið við

og púsl verður á vegi hennar

og loks meira dót

Um helgina var okkur boðið í þorramat til Láru og Badda og dætra sem voru nýkomin frá Íslandi eftir jólafrí. Það var huggulegt að venju hjá þeim og stór hluti íslenskra barna í Sjanghæ var á staðnum.

Efri röð: Edda, Örn, Ævar, Hugi með Eyju

Neðri röð: Lív með Ými, Björk, Stirnir og Boggi með Ástu

Hekla og Ásta

Ásta fædd 6. desember

Eyja

Lív og Edda spjalla við Eyju

Björk fékk að mata Eyju

Björk, þriggja ára síðan í desember

Árni og Magnús

Baddi með Björk

Við erum búin að vera heima í fríinu okkar, kannski kominn tími til. Veðrið hefur verið gott svo það er yndislegt að fara í göngutúra í sólskininu. Stemningin á götum úti er afslöppuð, margir í fríi og margar verslanir eru lokaðar og umferðin er miklu minni en venjulega.

Xin nian kuai le, gleðilegt ár, Dalla