Bleikklæddar vinkonur, Lí og Eyja





Smá blundur á leikteppinu



Á leið í heimsókn til Elsu



Feðgar á leiðinni til Noah Flesher í pönnukökuboð



Hugi fór á línuskautunum, hann er orðinn ansi klár á þeim



Fyrir utan húsið hans Noah með honum sjálfum



Hugi var ekki lengi að finna tré til að klifra upp í garðinum



Eyja fór í gallabuxur í tilefni amerísks pönnukökuboðs



Stirnir hugsi með nýja klippingu



Hugi líka með nýja klippingu



Strákar á ljónum





Eyja sefur í vagninum

Stóru bræðurnir voru á leið í bað í gærkvöldi og Eyja fékk að kúra hjá þeim í rúminu meðan þeir biðu eftir að rynni í baðið. Þeim fannst frekar fyndið að Eyja sæi þá allsbera.









Eyja fékk leikteppi og lá þar og brosti til Lí að venju. Ég reyndi að ná brosunum á mynd, þetta var það besta sem ég náði.

Í dag laugardag var haldið upp á afmæli Stirnis. Það er búin að vera spenna síðustu daga vegna veðurspárinnar og ég er búin að vera í stöðugu sambandi við manninn með hoppukastalann. En hann hékk þurr í dag þrátt fyrir rigningarspár svo kastalinn komst upp og það var mikið hoppað.



Árni og Noah Flesher sem kenndi Stirni í fyrra



Elsa og Eyja, Elsa fékk þónokkur bros frá Eyju



Hanae vinkona og bekkjarsystir Stirnis



Ömmurnar spjölluðu saman. Sænska amman við hliðina var fegin að hitta sænskumælandi ömmu hjá okkur.



Afmælisbarnið slær í pinjata













Boggi, Hanae, Ævar og Max smakka nammið



Stirnir skreytti kökuna alveg sjálfur og tókst vel upp


Slakað á í Wii þegar afmælið var búið

Stirnir var ánægður með veisluna og pakkana. Núna eru bræðurnir uppi að leika með nýja dótið. Hadley bekkjarsystir Huga er í heimsókn en hún ætlar að gista hjá okkur í nótt, frekar spennandi.

Dalla

Jóru finnst Eyja líkjast Huga, hvað finnst ykkur?



Hugi



Eyja

Þá kemur ferðasagan loksins. Það virðist vera annasamt starf að sinna þremur börnum og bara að koma sér í gírinn aftur á heimilinu svo ég hef varla sest við tölvuna síðan við komum á staðinn mægðurnar, ég, Eyja og mamma/amma.

Fyrsta flug gekk vel, Eyja svaf mestalla leiðina til Kaupmannahafnar og það fór vel um okkur, við fengum autt sæti á milli okkar. Biðin í Kaupmannahöfn gekk líka vel, við skráðum okkur inn í næsta flug og lentum á stúlku sem var ekki hjálpsöm. Ég spurði hvort við gætum fengið körfu til að leggja Eyju í á leiðinni, var búin að fá þær upplýsingar að þær væri ekki hægt að panta fyrirfram. Þessi hélt því fram að ég hefði þurft að panta fyrirfram, ég hefði fengið rangar upplýsingar. Þegar ég skoðaði brottfararspjöldin okkar betur sá ég að við mamma höfðum fengið sæti á sitthvorum staðnum í vélinni. Indæl stúlka sagðist ætla að kippa því í lag og athuga með körfuna umtöluðu. Við fengum því fín sæti, tvö saman á góðum klassa og á millivegg fyrir framan okkur var fest burðarrúm/karfa eftir flugtak sem Eyja svaf í. Ég gat því borðað í rólegheitum og sofnað líka.
Í Peking lentum við á nýopnuðum flugvelli og þar var skipulagið ekki komið í lag. Við þurftum að bíða mjög lengi eftir farangrinum, sérstaklega eftir kerrugrindinni. Við áttum eftir að kaupa flugmiðann handa Eyju svo ég skildi mömmu og Eyju eftir með farangurinn til að redda miðanum. Þá kom í ljós að við vorum orðnar of seinar í flugið og það þurfti að fá nýjan miða, ekkert flug laust fyrr en fjórum tímum seinna. Það gekk illa að útskýra hvað ég vildi og stúlkan sem afgreiddi miðann var óratíma að útbúa hann, hún handskrifaði hann allan. Þetta tók því klukkutíma í allt og gráturinn í Eyju var farinn að hljóma í hausnum á mér. Ég ímyndaði mér hana vakandi sársvanga því hún var sofandi þegar ég fór af stað. Mamma vissi ekki hvað hefði orðið af mér allan þennan tíma, var farin að halda að eitthvað hefði komið fyrir mig. Ég hljóp því af stað með miðana í höndunum og mætti mömmu með farangurinn, grátandi barn í vagni og tvo aðstoðarmenn sem höfðu séð aumur af henni. Við þurftum að fara yfir aðra flugstöðvarbyggingu og fengum aðstoð þessa góða fólks, Eyju var bara skellt á brjóstið og við gengum af stað. Þá tók við strætóferð í 20 mínútur og í hinni byggingunni þurftum við líka að kaupa miða handa Eyju og vorum voðalega fegnar þegar við losnuðum við farangurinn í innritun.
Við vorum orðnar fölar og fárar þegar við komumst í Sjanghæflugið, það bjargaði miklu að við fengum miða á fyrsta klassa svo við gátum hallað okkur vel aftur og blundað.
Í Sjanghæ urðu fagnaðarfundir, bræðrunum fannst litla systir hafa stækkað mikið.
Daginn eftir fengum við góðar heimsóknir, Hekla og Magnús komu með strákana og Atli og Ada og mamma Atla komu við líka.

Á sunnudaginn fórum við út úr bænum með Atla og kó. Skoðuðum vatnabæ sem heitir Zhouzhang, þar eru síki í gömlu hverfi og gaman að labba þar um. Hugi og Stirnir sinntu fyrirsætustörfum, ungar kínverskar konur eru spenntar fyrir að fá þá á mynd með sér. Barnavagninn vakti líka mikla athygli og margir reyndu að kíkja ofan í hann.



Eyja á leiðinni



Barnavagninn í kínverskum öngstrætum



Síkin í Zhouzhang




Veitingastaður í dyragætt



Hugi á siglingu





Eitt hinna mörgu svipbrigða Stirnis

Í vikunni höfum við mæðgurnar verið í miklum innkaupum, fórum í IKEA að finna kommóðu fyrir Eyjuföt með Elsu og borðuðum með henni hádegismat. Við fórum líka í Carrefour í stórinnkaup og fengum Lí með okkur. Við höfum aðgang að bíl núna með bílstóra svo ferðalög innan borgarinnar eru auðveldari. Svo er nú líka hægt að labba heilmikið um hverfið okkar og margt að sjá. Við gengum með Elsu á franskan veitingastað í gær og við mamma héldum svo áfram í röltinu, fórum líka með bræðurna í sund seinnipartinn.
Eyja brosir mikið til Lí, hún hefur verið spör á brosin hingað til en þegar Lí talar við hana á kínversku þá verður hún eitt bros. Það liggur við að við hin séum hálf afbrýðisöm.
Á mánudaginn fór ég í heimsókn í bekkinn hans Stirnis því hann bauð upp á súkkulaðiköku í tilefni afmælisins. Ég hitti nýja kennarann hans í fyrsta skipti og mér leist vel á hana. Hún sagði mér að Stirni gengi mjög vel í skólanum og hann væri orðinn fluglæs. Ég var líka hissa þegar ég heyrði hann lesa, honum hefur farið svo mikið fram.



Afmælisprinsinn krýndur af Mrs. Lewis



Afmælisbarnið elskar súkkulaðiköku

Í dag er stór dagur, afmælisdagur Stirnis, hann verður 6 ára og ferðadagur okkar mæðgna, förinni haldið til Kína. Það er búið að pakka nánast öllu niður og Eyja sefur enn, grunlaus um að hún sé að fara í 3 flugvélar.
Það verður frábært að sameinast feðgunum og byrja lífið okkar saman sem 5 manna fjölskylda í okkar húsi. Ég trúi því varla að ég sé búin að vera á Íslandi í 3 mánuði. En hérna hefur mér liðið vel í faðmi fjölskyldu og vina sem hjálpuðu mér í gegnum biðina eftir komu Eyju og samglöddust með mér þegar hún kom.
Þegar ég kom til Íslands hafði ég blendnar tilfinningar, spenna fyrir barnsfæðingu en líka mikill kvíði fyrir því sem gæti orðið, að barnið yrði mikið veikt. Það hvörfluðu að mér hugsanir um það hvort ég myndi vera með barn með mér þegar ég færi aftur til Kína.
En það er komið að því að kveðja Ísland í bili, halda á vit nýrra ævintýra með nýjum einstaklingi. Bræðurnir bíða spenntir eftir litlu systur, meimei, eins og það er sagt á kínversku. Vinir og nágrannar í Sjanghæ bíða líka spenntir eftir að sjá Eyju og kynnast henni.
Síðasta læknaheimsóknin hérna var í gær, 6 vikna skoðun sem kom ljómandi vel út, Eyja er búin að þyngjast um rúmt kíló frá fæðingu og lengjast um 7 sentimetra. Við fórum líka í sónar í gær vegna smells í mjöðminni á henni en það kom í ljós að mjöðmin var fín eins og annað. Ein vinkona sagði í gær að þetta barn væri mest sónarskoðaða barn sem hún þekkti. Kviðsónar á Landspítalanum fyrir páska kom líka vel út, ekkert óeðlilegt að sjá, allt glansandi fínt eins og barnalæknirinn sagði.

Við þökkum fyrir samveruna á Íslandi í bili og ástarþakkir fyrir allar fallegu gjafirnar sem eru komnar ofan í stóra tösku.

Á páskadag var Eyja í gömlum kjól af mér, hún var eins og dúkka, svo fín:







Stirnir afmælisbarn er mikið að hugsa um afmælisundibúning þessa dagana. Hann skrifaði lista yfir boðsgesti áður en hann fór til Kína. Hann er búinn að læra það í skólanum að það á að vera fingurbreitt bil á milli orða, hann leysti það þannig að hann teiknaði mynd af fingri á milli nafna á boðslistanum. Þetta fannst honum og okkur fyndið, þetta er hans húmor. Hann vildi bjóða þremur stelpum og einum strák úr bekknum sínum og svo var hans gamli kennari Mr. Flesher líka á listanum. Nágrannar okkar, sænsku krakkarnir og allir íslensku vinirnir voru líka skrifaðir niður. Þetta verður svaka partí og SS pylsurnar verða með í för okkar mæðgna frá Íslandi.

Ég færi ykkur ferðafréttir fljótt, bestu kveðjur, Dalla

Hugsi á skiptiborðinu


Geispar á milli brjósta


Eyja fær sopann sinn og líkist pabba sínum sem setur litla puttann út þegar hann drekkur kaffið sitt

Mæðgur á mánudegi í Mosó



Fyrsti göngutúrinn úti var stuttur vegna kulda

Jóra konunglegur hirðljósmyndari Eyju tók myndirnar

Lýsing Kjartans á fyrsta degi bræðranna í Shanghæ eftir mánaðardvöl á Íslandi:

Strákarnir sváfu lítið sem ekkert í flugvélinni. Stirnir ældi svo í Virgin pokann sinn í leigubílnum heim, og þeir voru báðir frekar rislitlir. Þeir hresstust aldeilis við þegar þeir komu heim, og var húsið umsvifalaust fullt af börnum æpandi og hlaupandi. Ég spurði þá afhverju þeir færu aldrei að leika sér hjá Svíunum, og þau sögðu mér að þar mættu þau ekki vera með læti. Þar höfum við það.

Síðan fórum við með Fredrik og þeim á línuskauta við Xujiahhui Park. Það var glaðasólskin og hiti. Krakkarnir þeystust um allt, með greyið Stirni hlaupandi á eftir, sem ég held að hafa hlaupið þrjá hringi í kringum allan garðinn.

Enn virtist nóg orka eftir í þeim, þannig að ég tók þá svo á O’Malleys, þar sem einhverjar þreifingar voru með það að hitta Bogga og Örn, en að lokum komust þeir ekki. Við vorum samt þar í góðu yfirlæti. Hoppikastali og dýramarkaður. Beðið um kisur og svoleiðis.

Ágætis úthald hjá þeim eftir meira en 24 tíma vöku.

Að lokum fórum við heim, og það slokknaði á þeim um circa sex leytið, sem hafði verið takmark mitt. Það ráð virðist hafa virkað, því að þeir eru ennþá sofandi og klukkan að verða 9.


Þeir sváfu víst til næsta morguns, í 16 klukkutíma. Allt gott að frétta af okkur mæðgum, Eyja fékk grátkast á laugardagskvöldið en vonandi var þetta tilfallandi því hún svaf vel í gær. Við erum byrjaðar að taka á móti gestum og það léttir okkur lund.

Dalla