Hitastigið hækkar

Nú er kominn tími á loftkælingu og moskítóvörn. Hitinn fór yfir þrjátíu gráður í gær og það verður líka heitt í dag. Maður verður hálfmáttlaus í hitanum, það tekur tíma að venja sig við. Afmæli hjá Bogga framundan, örugglega garðpartí.

En allir eru við góða heilsu í sumarhitanum, engin svínaflensa eða önnur flensa. Kínverjar taka svínaflensuna mjög alvarlega og allir flugfarþegar sem koma hingað eru hitamældir við komuna. CCP fólk sem lenti um síðustu helgi lýsti mönnum í hvítum búningum sem komu inn í flugvélina og beindu hitamælum að ennum farþeganna. Í vélinni, sem var full frá London, hóstaði kona mikið og maður sem sat við hliðina á henni reyndi að halla sér frá henni. Einhverjir voru teknir til hliðar til frekari skoðunar.

Hér í litlu raðhúsalengjunni (þrjú hús) okkar er mikill nágrannakærleikur. Nú er Mattias heimavinnandi eins og við Fredrik og við fylgjumst vel með hvert öðru. Við hittumst á morgnana þegar við fylgjum krökkunum út í skólabíl og plönum daginn. Fyrir utan hliðið okkar myndast oft ruslahrúga, þar er settur byggingarúrgangur úr næstu húsum og stundum gömul húsgögn. Við stöldruðum við um daginn og litum á gamlar kistur sem einhver hafði  hent út og okkur fannst þær líta sæmilega út. Þá sagði Fredrik að við værum líklega búin að vera of lengi í Kína fyrst við værum farin að líta tvisvar á rusl.

Eyja er orðin ansi ákveðin (frek) og mótmælir hástöfum þegar hún er tekin upp úr baðinu eða má ekki eitthvað. Hún er ekki farin að labba alveg enn, en hefur tekið tíu skref í einu svo þetta hlýtur að fara að koma. Það verður auðveldara að leyfa henni að leika úti þegar hún fer að labba. Við erum oft úti seinnipartinn þegar stóru krakkarnir eru komin heim úr skólanum og hún sækir í róluna og hengirúmið sem hangir úti. Hún skilur bæði íslensku og kínversku en segir ekki mörg orð. Það er mikil væntumþykja milli hennar og Lí og Lí er alltaf að segja mér hvað Eyja sé klár og yndisleg. Eyja veit alveg hvenær Lí fer heim því þegar Lí kemur niður með blautt hárið eftir sturtu byrjar Eyja að vinka bless. Lí eldar núðlur handa Eyju í beinasúpu sem hún útbýr með því að sjóða bein. Eyja borðar allt og er ekki matvönd eins og bræðurnir, hún elskar ávexti og grænmeti, kirsuberjatómatar, mangó og jarðarber eru í uppáhaldi.

Í dag er mæðradagurinn og ég fékk fallegar ástarjátningar sem Hugi og Stirnir gerðu í skólanum. Stirnir er soldið að spá í hvað ég sé gömul. Hugi lýsti því yfir um daginn að kaffi léti mann deyja fyrr en tedrykkja lengdi lífið. Stirnir spurði mig þá hvort ég drykki kaffi og ég sagðist drekka lítið af því. Hann virtist anda léttar.

Ebba drullumallar í portinu.

Carolína

Eyja við æfingatæki fyrir framan hjá Matta og Maríu. Þar vorum við í grillveislu um síðustu helgi.

Hugi aðstoðar systur sína við æfingarnar. Hann sópaði portið hjá Matta og Maríu með mikilli nákvæmni.

Atli, Matti og Jói

Kjartan sá um að grilla.

Atli spilar fyrir Eyju og Töru.

Ada, Atli og Tara.

Tara er brosmild.

Við vinkonurnar fórum á Nýlistasafnið MOCA í vikunni og Hekla, Ásta og Elsa eru þarna við háhýsin.

Ásta fimm mánaða prófaði matarstól í fyrsta skipti á veröndinni á safninu.

Dalla

Hættulegt stórborgarlíf

 

Við Eyja komum við á skrifstofu CCP í vikunni og hittum Maríu þar.

María og Eyja á svölum CCP

Við nágrannarnir ákváðum að bjóða æjunum okkar út að borða á miðvikudaginn. Við fórum á tævanskan stað og fengum góðan mat. Cindy og Lí eru hérna með skjólstæðingum sínum Eyju og Nellie Meimei.

 

Andrea

Dans fyrir utan veitingastaðinn.

Elin

Mattias

Fimm vinkonur.

Við Eyja fórum í playgroup og nágranninn okkar er alltaf mjög áhugasamur þegar við búum okkur af stað.

Kveðjustund.

Sjanghæ er álitin örugg borg. Hér verður maður sjaldan var við þjófnað eða ofbeldi. Helst að fólk rífist á götum úti þegar verða umferðaróhöpp. Af reynslu þeirra sem hafa lent í umferðaróhöppum er best að borga einhverja peninga, skiptir ekki máli hver á réttinn því að lokum eru útlendingarnir rukkaðir. Það virðist vera lögmál. Fredrik var sjokkeraður um daginn en þá keyrði leigubíll á hann þar sem hann gekk yfir götu á gangbraut. Leigubílstjórinn vippaði sér út úr bílnum, tók hann kverkataki og hélt honum föstum þar til lögregla mætti á staðinn. Að safnaðist múgur og margmenni og lætin voru svo mikil að Fredrik náði ekki að hringja eftir aðstoð því ekki heyrðist í símanum. Það var svo farið með hann á lögreglustöð þar sem hann náði ekki símasambandi. Eftir nokkra bið fékk hann að hringja eftir aðstoð kínverskumælandi manns og niðurstaðan varð sú að Fredrik greiddi leigubílstjóranum 500 rmb vegna skemmda á leigubílnum. Við hlógum að þessari sögu en ég sá að honum var brugðið.

Í gær keyrði Mr. Jin okkur Heklu heim til Melissu sem hélt playgroup þann daginn. Við fundum ekki hvar ætti að keyra upp að húsinu svo Mr. Jin stöðvaði bílinn í lítilli götu rétt við húsið, þar var engin umferð því þetta er í lokuðu íbúahverfi. Þegar við vorum að koma okkur út úr bílnum, sem tók kannski tvær mínútur bar að bíl úr gagnstæðri átt og bílstjórinn lagðist á flautuna því við vorum fyrir. Eyja svaf í bílstólnum en ég tók hana út og lagði hana frá mér og fór fram fyrir bílinn til að segja konu sem kom út úr bílnum og öskraði hástöfum að slaka á því við værum með smábörn. Þá rauk bílstjórinn líka út úr bílnum öskrandi af bræði og ég tók upp myndavélina sem hékk um hálsinn á mér og smellti af. Þá varð hann endanlega brjálaður og rauk að mér með kreppta hnefana á lofti.

Fyrsta myndin

Hleypur að mér með kreppta hnefana og miðaði svo á andlitið á mér.

Ég hrökklaðist undan og hann sá að sér á síðustu stundu.

Hér öskrar parið á Mr. Jin og öskrin stóðu lengi, við fórum inn í hús og leyfðum  þeim að leysa úr þessu.

Eyja og Francis

Ásta og Hekla

Ásta og Eyja

Gestgjafinn var lasinn og geymdur í hoppurólu.

Seinnipartinn fórum við nágrannarnir með krakkaskarann í garð í nágrenninu. Hugi var heima en hann er kominn með hita, aftur og nýbúinn. Við ætluðum að stilla okkur upp á grasinu en þá máttum við ekki vera með kerruna þar. Fredrik settist þá bara niður á gangstéttina með kaffisopann sinn.

 

Vörðurinn gaf okkur auga.

Mattias sem var uppgefinn eftir fyrstu vikuna sem heimavinnandi.

Dalla

Sumar í Sjanghæ

Við Eyja förum í daglegar göngur um hverfið okkar. Á mánudaginn sá ég eftir því að hafa ekki tekið myndavélina með. Á Changle lú var kona að gera að önd í ræsinu og nokkrar lifandi endur biðu í körfu á hjóli eftir kaupendum. Borgin er hávær og flaut, köll og bjölluhljómur er allsstaðar. Bjölluhljómurinn kemur frá þeim sem hjóla um á kerruhjólum og safna rusli til endurvinnslu. Hér er ekki hægt að skila í endurvinnslu en ég get verið viss um að það fer einhver í gegnum ruslið mitt eftir að það fer í tunnuna. Í síðustu viku sá ég konu sem fór í gegnum rusl sitja hérna í nágrenninu með stafla af Barnablaði Moggans sér við hlið. Það var ekki erfitt að geta sér til hvaðan það kom.

Þegar við beygðum inn í bakgötu tók fuglasöngur á móti okkur þegar við fjarlægðumst umferðina. Í garðinum við Nankeen safnið blakti við efni sem þornaði á snúrum, þetta fallega bláa og hvíta bómullarefni sem er handprentað. Ég keypti mér inniskó og kjól á Eyju.

Hér kemur myndasería:

Eyja með bók í kerrunni. Hún er orðin mikill lestrarhestur og bræðurnir hlaupa til hennar með bók ef það heyrist kvörtunartónn í henni.

Nellie Meimei nágrannavinkona sættir sig enn við að liggja í vagninum.

Eyja dansar við ABBA í afmæli Andreu.

Kjartan, Fredrik og Mattias við grillið.

Þessi furðuvera birtist í veislunni.

Philip og Stirnir í faðmlögum.

Carolína fékk að vera með.

Þessar eru örugglega sænskar, Andrea átta ára og vinkona til vinstri.

 

 

Eyja með bangsa, nývöknuð og svefnbólgin.

Í göngutúr gærdagsins hengdi stúlka út þvott við götuna.

Nú fara síðu nærbuxurnar að hverfa af snúrum með hækkandi hitastigi.

Það er ekki algengt að sjá vinnuvélar við götuframkvæmdir.

Kona skolar hrísgrjón við ræsið.

Út að ganga með hundinn?

Í hverfinu okkar eru nokkrir skólar og við heyrum nokkrar hringingar inn úr frímínútum á dag. Fur Elise er vinsæl hringing.

Það er algengt að sjá afa eða ömmu með barnabörnin.

Við hittum lítinn nágranna á heimleið.

Og Mattias og Nellie heilsuðu líka upp á nágrannana.

Með fjórar tennur eins og Eyja.

Nágrannar okkar fyrir utan hliðið, þetta er algeng sjón að sjá þessa tvo, annan við blaðalestur en hinn hugar að blómum í potti.

Dalla